لیاری کی تاریخ میں پہلی بار انٹر اسکولز جمناسٹک چیمپئن شپ کا انعقاد

لیاری کے ایک قدیم ترین اسکول  ڈی سی ٹی او گورنمنٹ بوائز اینڈ  گرلز سیکنڈری اسکول جو ایک غیر سرکاری تنظیم کرن فاؤنڈیشن کے زیر اہتمام چل رہی ہے ،  اس اسکول میں لیاری کی تاریخ میں پہلی بار انٹر اسکولز جمناسٹک چیمپئن شپ کا انعقاد 17 فروری 2018 بروز ہفتہ کو کیا گیا ،   ان مقابلوں کی خاص بات یہ تھی کہ اس میں پہلی بار لیاری سے باہر کے مین اسٹریم کے نجی اسکولوں مثلا کراچی گرامر ، حبیب پبلک ، بیکن ہاؤس عسکری  اور بقائی اسکول نے حصہ لیا․ اس سے پہلے ڈی سی ٹی او اسکول کے جمناسٹک کی ٹیم مسلسل کراچی کی سطح کے دو سے زاید مقابلوں میں ان اسکولز کے مقابلے میں نمایاں کارکردگی کا مظاہرہ کرتے ہوئے  دو بڑے ٹائٹل اپنے نام کرچکی ہے جسکے نتیجے میں سندھ اولمپک ایسوسی ایشن نے اس چیمپئن شپ کی میزبانی کا اعزاز ڈی سی ٹی او اسکول کو بخشا جو پورے لیا ری کے لئے ایک بڑے اعزاز کی بات ہے ․

مقابلے کے روز بچوں کا   جوش و خروش پورے عروج پر تھا  ، ڈی سی ٹی او اسکول کے طلبہ و طالبات  اپنی ٹیم کی حوصلہ افزائی کے لئے بھرپور اور پُرجوش طریقے سے تالیاں بجارہے تھے ،مقابلو ں کا باقاعدہ آغاز حسب دستور قومی ترانے سے ہوا ، تمام شریک 13ٹیموں نے میدان کا  مارچ پاسٹ کیا اور شائقین کی بھرپور داد حاصل کی ․

                                                                                                                                                                                                                                                                                                                                                                                    اس مقابلے میں لیاری کے عمائدین و زعماء کے علاوہ شہر کے دیگر معززین نے بھی شرکت کی ان میں مہمان خصوصی اعجاز خاں صاحب کمشنر کراچی ، جناب خالد بلوچ اسسٹنٹ کمشنر لیاری ، مختار کار لیاری ، سندھ جمناسٹک ایسوسی ایشن کے عہدےداروں جناب سید مرتضٰی صاحب ، مستقیم انصاری صاحب ، عمیر خاں صاحب جبکہ لیاری کے نمایاں شخصیات میں مصنف و دانشور رمضان بلوچ صاحب  ، سینئر سیاسی و سماجی رہنما عابد بروہی صاحب ،لیاری کی معروف سماجی شخصیت جناب امام بخش بلوچ صاحب، آل سندھ پرائیویٹ اسکول کے سینئر نائب صدر اور روز ایجوکیشنل سوسائٹی کے سربراہ جناب انور علی بھٹی ،ڈی ایف اے ساؤتھ کے عہدے دار و ماہر تعلیم جناب دوست محمد دانش نوجوان صناب حافی عمیر رزاق صاحب ، سماجی کارکن عبدالعزیز آسکانی کے علاوہ لیاری کے مختلف اسکولز کے صدر مدرسین نے بھی شرکت کی ، جبکہ کرن فاؤنڈیشن کے چیئر پرسن  میڈم سبینہ کھتری صاحبہ کے خصوصی دعوت پر اینگرو فاؤنڈیشن کے جناب فواد صاحب ، کراچی کے معروف ماہرین تعلیم و عمرانیات محترمہ ندا کرمانی اور محترمہ مائرہ میانجی نے بھی شرکت کی ․

مقابلوں کے دوران ہی مہمانوں نے وقتا فوقتا  اسکول کے مختلف حصوں کا دورہ بھی کیا اور اسکول کے معیار اور خوبصورت ماحول کی بےحد تعریف کی ․ مقابلے کے اختتام پر   کمشنر کراچی جناب اعجاز خان صاحب نے کامیاب بچوں اور ٹیموں میں انعامات تقسیم کئے اور لیاری سے تعلق رکھنے والے باکسنگ کے دو معروف کوچ استاد امین بلوچ اور  استاد نواب احمد کے لئے انکے خدمات کے اعتراف میں پچیس پچیس ہزار روپے نقد کا اعلان بھی کیا ․ اس موقع پر طلبہ و طالبات کے فوڈ کورٹ کا بھی اہتمام کیا تھا         اس خوبصورت اور رنگارنگ تقریب کا اختتام ڈی سی ٹی او اسکول کے بچوں کے خوبصورت ڈانس اور جمناسٹک پرفارمنس پر ہوا․
رپورٹ مرتبہ ۔ شبیر حسین بلوچ